Jam 5 | MED | STEP | Enim mel pi wamp mbᵾ ye! Akup na nga ik ei pilᵾi! Enim ka mindil tᵾk itᵾi! Nambuⱡ emel, mbun elpa elpa mat, enim kᵾn omba enim.

James 5

Wamp Mel Pi Mbᵾ Nga Ik Ti

1 Enim mel pi wamp mbᵾ ye! Akup na nga ik ei pilᵾi! Enim ka mindil tᵾk itᵾi! Nambuⱡ emel, mbun elpa elpa mat, enim kᵾn omba enim. 2 Enim nga mel tetmin mbᵾ, purpa num ndumba, wote mul na mbᵾ gorokᵾna kuimp ropa etmba. 3 Enim nga ku gol na, ku silpa eng nui mbᵾ raⱡ rorum. Raⱡ ei ndi, enim nga puⱡ ei, akpa nimbᵾ, wote ndip mel, wamp kᵾng kᵾⱡ norum. Akup ui pora nimba enim ila, enim mel mbᵾ, tᵾk mou rok ku mormin. 4 Enim nga kongun endᵾtᵾm wamp mbᵾ, ku moni ngui nganggᵾⱡina, enim kᵾn ik ranggᵾk ik kit nᵾk mormin. Rᵾng tᵾk mou rok, ka etᵾk enmin ei, Got Oⱡa Nuim Ronduⱡ pi ei ndi, pilpa morum. 5 Enim ya mᵾi kona ila molk, mel minal tek ambulk palk mormin. Wote, enim rᵾng minal nok, kᵾng puⱡnga mormin, ropa kondᵾmba enim ei nga, tᵾk mendᵾk mormin. 6 Enim ndi, wamp kun kai mbᵾ, ik mura ngᵾk, rok kondᵾk etᵾng. Wote, enim kᵾn, punt rui narᵾk, kandᵾk kui etᵾk mormin.

Oⱡa Tᵾpa Kᵾni Uⱡ Ila Ronduⱡ Mundᵾp Moⱡpᵾn, Atinga Rᵾmin

7 Na nga angmᵾn, ronduⱡ mundpᵾn moⱡpᵾn, mbun mbᵾ tᵾp koma ropᵾn, Nuim ei, yant omba ei nga nokᵾndmin. Kongun wu mbᵾ ndi, ronduⱡ mondᵾk, kongun etᵾk rᵾng etᵾk, oⱡa tᵾtmin. Ei kona romba, muna ant mba, nᵾk ᵾkpᵾk ti natᵾk, ronduⱡ mundᵾk molk, etpa pora nduⱡnga, rᵾng tᵾk normin. 8 Enim i ku etᵾk, ronduⱡ puk muⱡᵾi! Nuim ei, nondpa yant omba enim ei nga, enim numan wang nduk muⱡᵾi! 9 Angmᵾn, enim wamp mat kᵾn ik polk, ik mbuldung nᵾndᵾk iti nᵾtᵾi! Enim kᵾmp ti nᵾtangga! Enim Kᵾmp Tᵾmba Wu ei, int nondpa onum.

10 Na nga angmᵾn, unt painui wu mbᵾ ndi, mbun mindil urum mbila, ronduⱡ puk molk, Nuim ei nga ik nᵾndᵾtᵾng ni, tᵾk mendᵾk pilᵾi! Enim uⱡ ei mel pilik, pep rok itᵾi! 11 Wamp mbᵾ mbun mindil uⱡ mbila, ronduⱡ puk morung ei nga, akup wamp mbᵾ kundpᵾn, memp ronduⱡ ti wamp nimin. Unt wu Jop, mbun mindil ila ronduⱡ mba moⱡnga, akil tepa, Nuim ei ndi, memp pinditim uⱡ ei, enim pᵾtmin. Wamp kont kul uⱡ ei nga puⱡ ei, Oⱡa Nuim ei morum.

12 Wote, na nga angmᵾn, enim ndi, ik ti ronduⱡ mundᵾk nᵾk kᵾn, wi muⱡ kona kep, ya mᵾi kona kep, mbi tek angᵾndᵾk, nᵾk mᵾi rᵾi nᵾrᵾi! Enim nga puⱡ ei, Got ndi, akpa ni nᵾnangga! Ei nga pilik kᵾn, “Mon,” nᵾng ndam, ik mendpᵾⱡ ei nᵾi, muna “Kapⱡa,” nᵾng ndam, kapⱡa mendpᵾⱡ ei nᵾi!

13 Enim nga ruk ting ila wamp ti, mbun mindil mat tᵾm ndam, elim Got kᵾn, atinga rangga! Wamp ti, numan kai pem ndam, Got nga mbi paka ropa, kinan mat nangga! 14 Wamp ti, kui rom ndam, wamp ei, rᵾp wu ti, wi ropa tangga! Rᵾp wu ei ndi, elim Nuim ei nga mbi tᵾpa angᵾndpa, atinga ropa, kopung kandpa etangga! 15 Mondᵾk pilik atinga rong ei ndi, wamp ei nga kui wang nimba. Wote, Nuim ei ndi, wamp ei, etpa tᵾpa uⱡ kit etᵾm mbᵾ, pendpa kelmba. 16 Ei nga, enim nga uⱡ kit etmin mbᵾ, para nduk nᵾk, atinga rok itᵾi! Uⱡ ei mel eng ndam, enim etpa wang ndumba. Wamp kun kai mbᵾ nga atinga rormᵾn ei ndi, ronduⱡ ngumba, tᵾpa rapundpa etᵾm.

17 Unt painui wu Ilaija ei, tᵾn wamp ei mel, kapⱡa murum. Wu ei, Got kᵾn atinga ronduⱡ mundpa ropa, kona ndamᵾng rui nᵾrangga nilinga, kona rui narᵾⱡnga pana raldika, wote kalimp tᵾmbᵾkak gul raⱡ omba purum. 18 Wu ei, aldpa atinga roⱡnga, muⱡ ila kona ndamᵾng mana ndurum, wote pana rᵾng mbᵾ oⱡa urum.

19 Na nga angmᵾn, enim nga ruk ting ila wamp ti, ik kupa ei wak ropa, tiki poⱡpa ᵾndangga kᵾn, wamp ti ndi mba, etpa rukᵾr tᵾm ndam, wamp ei nga min ei, etpa peng kont tᵾmba. Wote, uⱡ kit minal etᵾm mbᵾ, Got ndi, wak rondpa, uⱡ kit mbᵾ nga ni nanᵾmba.